المجلس العسكري .. أنا مصري أنا ضده

المجلس العسكري قال نهاية الفترة الإنتقالية بعد 6 أشهر ومدها ل 2013 , المجلس العسكري قال تفعيل قانون الغدر ورجع في كلامه , المجلس العسكري قال مافيش محاكمات عسكرية للمدنيين ورجع في كلامه .
المجلس العسكري .. أنا مصري انا ضده

كان لسه فاضل

كان لسه فاضل قبل الوداع

كام كلمه مقولتهمش

كان لسه فاضل

تقوليلي كام مره كمان

متخافش

لسه فاضل أماكن كتير

مروحنهاش

وبوسه على جبينك

ماخدتهاش

وكلمه مش هسيبك بتهمس منك

عشان تطمني

مسمعتهاش

كان لسه فاضل إيام كتير

متفقين نعيشها

وأتكتب فجأة كده

منعيشهاش

كان لسه فاضل هديه ليوم ميلادك

تخديها وتحضنيني

وفرحه تشوفها عيني

زيها ماشوفتهاش

كان لسه فاضل

أشوف بنتي منك

وأسميها علي اسمك

واحبها اد ما بحبك

كان لسه فاضل

سنين جوا حضني تعيشيها

معيتيهاش

كان لسه فاضل حاجات كتير

أوي ياحبيتي

قبل الوداع معملنهاش

قبل الوداع معملنهاش

حـشـد

حشد...
حواليا وانا متشال
وسحابه حزن بتمطر دموع
وخشوع
ورعشه قلب بتنادي وبتدعي
بالغفران
ودمعه حد مش قادر يصدق
إني أنتهيت
وصرخه بالعافيه طالعه تزود الأحزان
كان بدري الأوان
وحد يرد
هو كده الأوان مالوش مواعيد
و حد يقول
ده كان لسه معايا اول امبارح
ده كان حتي سعيد
وذكرى بتعدي علي بال صاحبي
سعيد
وهو بيخبي وشه الحزين
في حضن أخويا مأمون
فجأة يعم صمت مُهيب
والتراب عاليا بينهال وسط الشجون
وجمله الكل رددها
إنا لله وإنا إليه راجعون